Chor viril-baselgia da Falera

 

Oriundamein existevan a Falera dus chors virils, in chor cecilian ed in chor viril profan. Il Chor cecilian ei il vegl da quels. Ina gliesta da commembers digl onn 1939 cumprova ch’el existeva gia igl onn 1881. Fetg probablamein eis el vegnius fundaus igl onn 1880 da Gion Gieri Darms (1858-1927), scolast en siu vitg nativ da 1878 – 1907 e silsuenter inspectur da scola  tochen cuort avon sia mort. Las empremas statutas enconuschentas dil chor dateschan dils 5 da fevrer 1937. Il Chor cecilian ei vegnius dirigius tochen tier la fusiun cun il chor viril, pia duront  ca. 70 onns da mo 4 dirigents: Gion Gieri Darms, Hasper Cajochen, Rest Gieri Casutt e Lorenz Casutt, tuts quater scolasts da Falera. Duront quels decennis ha il  chor cantau messa dumengia per dumengia ed a caschun da tuttas fiastas ecclesiasticas. A tuttas fiastas da cant cecilianas che han giu liug en nossa regiun ha el priu part cun fetg bien success.

Il Chor viril ei medemamein vegnius fundaus da  Gion Gieri Darms igl onn 1898 cun 23 cantadurs. Silla gliesta da commembers digl onn 1922 figureschan 32 nums. Entuorn ils onns 1950 dumbrava el ferm 50 commembers. Ils medems onns ha la mecanisaziun dall’agricultura entschiet a Falera sco dapertut en Surselva e biaras forzas da lavur ein vegnidas danvonz. La giuventegna ha pli e pli bandunau il vitg. La consequenza ei stada ina reducziun dil diember da commembers dils dus chors. Igl onn 1969 ein ils dus chors stai  sfurzai da fusiunar per garantir il cant en baselgia ed il profan sco tochen dacheu. Oz ha il chor 33 commembers e stat dapi sis onns sut la direcziun da Heidi Casutt-Cathomen. Cun fetg bien success ha ella dirigiu siu chor gia a caschun da tschun fiastas da cant: 2010 Fiasta da cant glarunesa a Linthal, 2011 Fiasta da cant sursilvana a Glion, 2012 Fiasta da cant cantunala a Trun, 2013 Fiasta da cant ceciliana  a Laax e 2015 Fiasta da cant federala a Meiringen.

Duront ils varga 120 onns da sia existenza ha il Chor viril priu part da tuttas fiastas da cant districtualas cun excepziun da quella da 1913 a Breil, d’entginas fiastas da cant cantunalas (Mustér 1980, Flem 1993, Trun 2013)  e quei adina cun fetg bien success. Duront quels onns eis el vegnius dirigius da 10 dirigents: Gion Gieri Darms, Gieri Casutt, Rest Gieri Casutt, Lorenz Casutt, Otto Camenisch, Venanzi Valaulta, Ignaz Cathomen, Giusep Giuanin Decurtins, Markus Zarn e Heidi Casutt-Cathomen. Cun excepziun da Markus Zarn, Landquart, ein tuts stai sesents a Falera e cun excepziun da Heidi Casutt-Cathomen da professiun scolasts. Il chor viril Baselgia da Falera sepresenta oz en buna fuorma e nus sperein che quella possi semantener aunc biars decennis.