Chor viril-baselgia da Falera

Oriundamein existevan a Falera dus chors virils, in chor cecilian ed in chor viril profan. Il Chor cecilian ei il vegl da quels. Ina gliesta da commembers digl onn 1939 cumprova ch’el existeva gia 1881. Probablamein eis el vegnius fundaus 1880 da Gion Gieri Darms (1858-1927). Las empremas statutas enconuschentas dil chor dateschan dils 5 da fevrer 1937. Il Chor cecilian ei vegnius dirigius tochen tier la fusiun cun il chor viril, pia duront  ca. 70 onns da mo quater dirigents: Gion Gieri Darms, Hasper Cajochen, Rest Gieri Casutt e Lorenz Casutt. Duront quels decennis ha il  chor cantau messa dumengia per dumengia ed a caschun da tuttas fiastas ecclesiasticas. A tuttas fiastas da cant cecilianas che han giu liug en nossa regiun ha el priu part cun fetg bien success.

Il Chor viril ei medemamein vegnius fundaus 1898 da  Gion Gieri Darms. All’entschattadumbrava el 23 cantadurs. Igl onn da cant 1922 dumbra el 32 cantadurs. Entuorn ils onns 1950 schizun 50.

Ils medems onns ha la mecanisaziun dall’agricultura entschiet a Falera sco dapertut en Surselva e biaras forzas da lavur ein vegnidas danvonz. La giuventegna ha pli e pli bandunau il vitg. La consequenza ei stada ina reducziun dil diember da commembers dils dus chors. 1969 ein ils dus chors stai  sfurzai da fusiunar per garantir il cant en baselgia ed il profan sco tochen dacheu. Oz ha il chor 33 commembers e stat dapi sis onns sut la direcziun da Heidi Casutt-Cathomen.

Duront ils varga 120 onns da sia existenza ha il Chor viril priu part da tuttas fiastas da cant districtualas cun excepziun da quella da 1913 a Breil, d’entginas fiastas da cant cantunalas (Mustér 1980, Flem 1993, Trun 2013)  e d’ina fiasta federala (Meiringen 2015). Duront quels onns eis el vegnius dirigius da 10 prsunalitads: Gion Gieri Darms, Gieri Casutt, Rest Gieri Casutt, Lorenz Casutt, Otto Camenisch, Venanzi Valaulta, Ignaz Cathomen, Giusep Giuanin Decurtins, Markus Zarn e Heidi Casutt-Cathomen. Cun excepziun da Markus Zarn, Landquart, ein tuts stai sesents a Falera. Il chor viril baselgia da Falera sepresenta oz en buna fuorma e nus sperein che quella possi semantener aunc biars decennis.